ياترى انتوا لسه بتحبوا مصر؟؟؟؟؟

يا ترى إحنا لسة بنحب مصر

قبل ما تندفع وتقول طبعا دى مصر هى امى ونيلها هو دمى وتكلمنى عن شهامة ولاد البلد واخلاق بنت البلد وبنات وسط البلد ...... خلينا نتكلم بواقعية شوية .
يا ترى يا جماعة مصر بتمثل لكل شاب فينا ايه ..... ياترى ذكرياتك الحلوة فيها اكتر ولا الوحشة
مصر بلدنا اللى اتحولت الحياة فيها لمعاناة مستمرة من اول ما تفتح عينيك الصبح لحد ما تغمضها باليل ...... تنزل الصبح من البيت ويبدأ الصراع .... صراع مع سواق الميكروباص وصراع مع ركاب الميكروباص ..... صراع مع زميلك فى الشغل وصراع مع ظابط المرور ومع سواق التاكسى ومع موظفين الحكومة ومع الناس اللى فى الشارع ....... سيبك طبعا من صراع غض البصر اللى غالبا بتخسر فيه لأنك ممكن تخبط فى عامود نور وانت ماشى عشان مبقاش ينفع تبص غير فى الأرض ...... مصر اللى مبقاش فيها حاجة صح لا تعليم ولا صحة ولا إسكان ولا اخلاق .... مصر اللى الشرطة فيها بتقهرنا واصحاب رأس المال بيستعبدونا .... مصر اللى شعبها من كتر الهم والجوع اتخلقت عنده عقد نقص وكراهية ضد الأخرين ..... مصر اللى كتر فيها الإجرام وبدل شهامة ولاد البلد ... بقى تحرش الولاد بالبنات فى وسط البلد ..... مصر اللى تخاف على بنتك ومراتك يمشوا لوحدهم فى الشارع خايف عليهم من 1000 خطر ... تحرش وسرقة وإغتصاب وسفاح المعادى ورخامة امناء الشرطة وغلاسة ولاد البلد .
شايفين بلادنا بقيت عاملة إزاى يا جماعة ....... يا جماعة محدش يفهم انى عايز اقول انى بكره بلادى او بحرض على كراهيتها ..... ابدا والله انا بفضفض عشان انا نفس مبقيتش فاهمه ........ شايفين كل البلاوى اللى فى مصر دى بس برغم كدة حد فينا حاسس انه بيكره مصر بردو لأ ............ طيب مصر دى ايه حكايتها .
انا حاسه الإحساس ده وعارفه انكو كلكوا حاسين نفس الإحساس ........ كل ما احاول اكرهها ميهونش عليا اقولها ..... كل ما افكر انى اهاجر قلبى مايطاوعنيش انى اتخيل حتى .... كل ما اتخنانق مع سواق ميكروباص ..... اقابل راجل طيب مبتسم قاعد جمبى فلا املك إلا الإبتسام ....... كل ما اتقزز من افعال الشرطة ومن التعامل معاهم ....... اقع فى ظابط ابن ناس اوى ومحترم والاقيه بيعامل الناس كويس ...... كل ما افتكر مشاكل سواقين التاكسى اركب مع سواق تانى راجل بركة يدعيلى ........ كل ما اتخنق من البنات الكاسيات العاريات اقابل اخت محترمة كويسة اوى .... اقول الحمد لله الدنيا بردو بخير ............ كل اما اشوف العراق واللى بيحصل فيها واتخيل ان ده ممكن يحصل لمصر احس بألف شوكة فى قلبى واحس ان الدم بيغلى فى عروقى وعايز اقف على حدودها واموت الف مرة دفاعا عن بلادى .
يا جماعة انا بجد مش فاهمه ..... هو انا لوحدى اللى متعذبه فى حب وكراهية البلد دى ولا ده إحساس جيلنا كله تعالو نواجه نفسنا ونجاوب عالسؤال ده

ياترى انتوا لسة بتحبوا مصر